პეკინში ანსამბლ "ერისიონის" კონცერტები გაიმართა

წარმოდგენის დაწყებამდე, დამსწრე საზოგადოებას მისასალმებელი სიტყვით მიმართა ჩინეთის სახალხო რესპუბლიკაში საქართველოს საგანგებო და სრულუფლებიანმა ელჩმა, პაატა კალანდაძემ.

 

ჩინელი მაყურებელი გამორჩეული ინტერესითა და ოვაციებით შეხვდა ქართულ მრავალხმიანობას, ეროვნულ ცეკვებსა და საქართველოს მდიდარ ფოლკლორულ მემკვიდრეობას. „ერისიონის“ მიერ წარმოდგენილმა პროგრამამ დამსწრე საზოგადოებას გააცნო ქართული კულტურის მრავალფეროვნება, ტრადიციები და ქართველი ხალხის უნიკალური შემოქმედება.

 

აღსანიშნავია, რომ ხსენებული კონცერტის ფარგლებში წარმატებით განხორციელდა „ერისიონსა“ და ჩინურ ფოლკლორულ კოლექტივ „China Oriental Performing Arts Group“-ს შორის თანამშრომლობა, კერძოდ, შესრულდა ხსენებული ჩინური კოლექტივის მუსიკალური ნომერიც.

 

კონცერტს ესწრებოდნენ ჩინეთის სახელმწიფო უწყებების, დიპლომატიური კორპუსის, კულტურის სფეროს, აკადემიური წრეებისა და ბიზნეს სექტორის წარმომადგენლები, ასევე ჩინეთში მცხოვრები საქართველოს მოქალაქეები და ქართული კულტურის მეგობრები.

 

13 და 14 ივნისს, „პეკინის ხელოვნების სეზონის“ ფესტივალის ფარგლებში, ანსამბლ „ერისიონმა“ კონცერტები გამართა პეკინის თანამედროვე ხელოვნების ცნობილ სივრცეში - „798 არტ-ზონის“ ტერიტორიაზე, სადაც მაყურებელს ჰქონდა შესაძლებლობა, გაცნობოდა ქართული მუსიკის, ცეკვისა და მრავალხმიანი სიმღერის უნიკალურ ტრადიციებს, ხოლო კონცერტების შემდეგ გაიმართა ქართული ცეკვის მასტერკლასი, რომელმაც დამსწრე საზოგადოებაზე დიდი შთაბეჭდილება მოახდინა.