საქართველოს საელჩო ჩინეთის სახალხო რესპუბლიკაში

საქართველო-ჩინეთი ეკონომიკური ურთიერთობები

2018 წლის 1 იანვრიდან, ძალაში შევიდა საქართველოსა და ჩინეთს შორის თავისუფალი ვაჭრობის შესახებ შეთანხმება (FTA), რამაც დამატებით წაახალისა სავაჭრო ურთიერთობები ორ ქვეყანას შორის. შედეგად, 2018 წელს, სავაჭრო ბრუნვის მოცულობამ პირველად გადააჭარბა 1 მილიარდ აშშ დოლარს.

საქართველოს უმსხვილეს სავაჭრო პარტნიორ ქვეყნებს შორის, ჩინეთი იკავებს რიგით მესამე ადგილს 9.8%-ით. 2022 წლის მონაცემებით, საქართველო-ჩინეთის სავაჭრო ბრუნვის მოცულობამ შეადგინა - 1 მილიარდ 863 მილიონი აშშ დოლარი, რაც გასული წლის მაჩვენებელს 26%-ით აღემატება.

ორ ქვეყანას შორის სავაჭრო კავშირებში ექსპორტის წილია 39.5%-ი. ჩინეთი წარმოადგენს ყველაზე მსხვილ საექსპორტო ბაზარს ქართული პროდუქციისთვის. 2022 წელს, ჩინეთში საქართველოს ექსპორტმა 737 მილიონი აშშ დოლარი შეადგინა (+20%), ხოლო იმპორტმა - 1 მილიარდ 126 მილიონი აშშ დოლარი (+22%).

ჩინური ინვესტიციები საქართველოში

ჩინეთიდან საქართველოში ინვესტიცია, პირველად განხორციელდა 2002 წელს. აღნიშნული პერიოდიდან 2022 წლის ოქტომბრამდე, სულ განხორციელდა 699.42 მლნ აშშ დოლარის ინვესტიცია. 2022 წლის სამი კვარტლის მონაცემებს (იანვარი-სექტემბერი), ინვესტიციების მოცულობამ შეადგინა 74,46 მლნ აშშ დოლარი.

2022 წლის 1 ოქტომბრის მდგომარეობით, საქართველოში დარეგისტრირებულია აქტიური სტატუსის მქონე 393 კომპანია, ჩინური კაპიტალის მონაწილეობით.

ჩინეთის კაპიტალით შექმნილია 1 857 საწარმო, საქართველო-ჩინეთის წილობრივი კაპიტალით -153 საწარმო, ჩინეთის და მესამე ქვეყნების წილობრივი კაპიტალით - 7 საწარმო და ერთი საწარმო საქართველო-ჩინეთის და მესამე ქვეყნის წილობრივი კაპიტალით.

ქართული ღვინის ექსპორტი

ჩინეთში მოქმედებს 40-მდე ქართული ღვინის სახლი, მაღაზია და სალონი. ობიექტები გახსნილია ქალაქ შანხაიში, სინძიან უიგურეთის ავტონომიური რეგიონში, ასევე ჭეძიანგის, ძიანგსუსა და გუანდუნგის პროვინციებში.

უმსხვილესი იმპორტიორი კომპანია „ბეიფანძიედას’’ მიერ, პირველი ქართული მაღაზია/რესტორანი ჩინეთში გაიხსნა 2011 წელს, ქალაქ ურუმჩიში.  ხოლო, პირველი ღვინის სახლი ჩინეთში გაიხსნა 2015 წელს, ქალაქ ხორგოსში.

ღვინის ექსპორტს ჩინეთში 60-მდე ქართული ღვინის მწარმოებელი კომპანია ახორციელებს. საქსტატის 2022 წლის მონაცემებით, ჩინეთში ღვინის ექსპორტის ღირებულებამ შეადგინა - 12.5 მილიონი აშშ დოლარი, ჩინეთი არის ქართული ღვინის სტრატეგიული ბაზარი.

ჩინელი ვიზიტორების რაოდენობა საქართველოში

საქართველოსა და ჩინეთს შორის გაფორმებულია (2012 წლის 25 მაისი) ურთიერთგაგების მემორანდუმი, ჩინეთის ტურისტული ჯგუფების საქართველოში მოგზაურობის ხელშეწყობის შესახებ, რომლის საფუძველზეც  ჩინეთმა საქართველოს მიანიჭა შესაბამისი სტატუსი - “Approved Destination Status”.

საქართველოსა და ჩინეთს შორის ტურიზმის სფეროში თანამშრომლობის განვითარებას და  ჩინელი ვიზიტორების რაოდენობის ზრდას ხელი შეუწყო 2016 წლიდან პირდაპირი ავიარეისების შემოღებამ (თბილისი-ურუმჩი-პეკინი-ურუმჩი-თბილისი).

პანდემიით და ჩინეთის ე.წ. "ნულოვანი კოვიდ პოლიტიკით" გამოწვეული საკარანტინო წესების, ასევე, საჰაერო კომუნიკაციის შეზღუდვების გამო, 2020-2022 წლებში, ჩინეთიდან საქართველოში შემოსულ ვიზიტორთა რაოდენობამ მნიშვნელოვანად იკლო. თუმცა, 2022 წელს, 113%-ით გაიზარდა ჩინეთიდან საქართველოში შემოსულ ვიზიტორთა რაოდენობა და  შეადგინა 7 380.